ادارې، بنسټونه او سازمانونه

د مدینې منورې اسلامي پوهنتون

 

د مدینې منورې پوهنتون یو نړیوال اسلامي پوهنتون دی او د سعودي عربستان له مشهورو پوهنتونونو څخه ګڼل کیږي ، یاد پوهنتون کې شرعي او اسلامي علومو ته لومړیتوب ورکول کیږي .

د بنسټ ډبره یې په  ۱۳۸۱ هجري کال کې  د عربې جزیرې په سپیڅلي ښار مدینه منوره کې د ملک سعود په امر کیښودل شوه او سملاسي پکې د شرعي علومو زده کړې پیل شوې .

په دې پوهنتون کې مخورو علماوو لکه ابن باز او ابن عثیمین او داسې نورو جیدو علماوو د تدریس برخه پرمخ بیولې وه چې اوس هم پکې د سعودي عربستان او ځینو نورو اسلامي هیوادونو مشهور علماء تدریسې چارې پرمخ بیایې ، د اسلامي امت ځينو مشهورو علماوو او داعیانو په همدې پوهنتون کې لوړې زده کړې ترسره کړي چې په دې کې د افغانستان او پاکستان هیوادونو ځینې علماء هم شامل دي د بیلګې په توګه استاذ محمد یاسر ، مولانا حسن جان مدني ، ډاکټر شیر علي شاه او داسې نور …

د ۴ کلونو زده کړې وروسته دا پوهنتون فارغینو ته د لیسانس عالمي سند ورکوي .

په اسلامي پوهنتون کې د زده کړې مراحل :

۱ـ دکتوراه : چې موده یې له ۲ کلونو څخه تر ۴ کلونو پورې ده .

۲ـ ماسټري : چې درسي موده یې ۴ کلونه ده .

۳ـ لیسانس : چې درسې موده یې ۴ کلونه ده .

محصلين کولاې شي چې د لاندې شروطو په پوره کولو سره په دغه پوهنتون کې د زده کړو لپاره داخله وکړي :

۱ـ د اسلام مقدس دین ته پوره احترام او دهغې پورې اړوند احکامو ته په پوره توګه التزام .

۲ـ د قرآني علومو پوهنځي ته ورتلونکی محصل باید د قرآن کریم حافظ وي .

۳ـ د محصل عمر باید د ۲۵ کلونو کم وي .

۴ـ محصل باید د ثانویې (لیسې) سند ولري او خپل سند په هیواد کې د سعودي له سفارت څخه تصدیق کړي ، او د محصل د نومرو سلنه باید له ۸۰٪ څخه ټیټه نه وي .

۵ـ محصل باید له ټولو ناروغیو پاک وي .

نوموړی پوهنتون د شرعي علومو د پوهنځي تر څنګ یو شمیر نور پوهنځي هم لري ، د شریعت ، اصول الدین او عربي ادبیاتو د پوهنځیو ترڅنګ د طب ، انجینیرې ، کمپیوټر ساینس او داسې نورو عصري علومو د زده کړې پوهنځي هم لري .

ځینې مشهور پوهنځي یې په لاندې ډول دي :

۱ـ د شرعي علومو پوهنځی (فقه ، السیاسة الشرعیة ، قضا).

۲ـ د قرآني علومو پوهنځی (قراءات او تفسیر القرآن) .

۳ـ د دعوت او اصول الدین پوهنځی (عقیده ، دعوت ، اسلامي تاریخ) .

۴ـ د حدیثو پوهنځی (فقه السنه ، علوم السنه) .

۵ـ عربي ادبیات (بلاغه ، ادب عربي ، نحو ، صرف ..) .

د شرعي زده کړو پرته دا پوهنتون د عصري علومو په زده کړو کې د طب ،هندسې ، کمپیوټر پوهنې او داسې نور پوهنځي لري .

د مدینې منورې اسلامي پوهنتون ته د اسلامي هیوادونو بې شمیره ځوانان د زده کړو لپاره راځي .

د لا ډیرو  معلوماتو لپاره کولای شئ د اسلامي پوهنتون رسمي ویب پاڼه وګورئ:

http://www.iu.edu.sa/Pages/default.aspx

ترتیب : أنس شيرزاد

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
وسیع ویب
error: checked