روغتیايي زیانونهکمپيوترموبایل

د ځیرکو ټیلیفونونو شپږ وژونکي زیانونه

د ټکنالوژي نړۍ په ډېرې چټکتیا سره وده او پرمختګ کوي . که څه هم له یوې خوا زموږ په ژوند باندې هره ورځ نوي او ښه امکانات زیاتېږي، خو له بلې خوا همدا موډرن کېدل، زموږ د ځان بلا ګرځي او زموږ په ژوند کې وېرونکې پېښې را منځته کوي . د ځیرکو ټیلیفونو وژونکو زیانونو ته په نه پام سره، په دې وروستیو کلونو کې له دې وسیلې څخه ډېره زیاته ګټه اخلو . سمه ده، چې د یوې پاڼې په لمس کولو سره د څو ثانیو په لړ کې د نړۍ له بېلابېلو برخو سره وصل کېږو او له خپل ژوند څخه خوند اخلو، خو باید هغو خطرونو ته هم پام وکړو، کوم چې په کمین کې دي .

۱ ـــ په سترګو باندې ډېر زیات فشار :

سره له دې چې ګرځنده ټیلیفون یا ټبلېټ ته ډېر کتل، نه شي کولای، چې سترګو ته تل پاتې زیان واړوي، خو سترګې ستړې کوي . په حقیقت کې د موبایل صفحې ته ډېر کتل، کولای شي، د سترګو د وچوالي سبب وګرځي او لید یې کمزوری کړي .

په خوب ځای کې له ځیرک ټیلیفون څخه ګټه اخیستنه او له هغه څخه خپرېدونکې وړانګې، د دې سبب ګرځي، چې په بدن کې ماتونین ( د خوب هورمون ) له ګډوډیو سره مخامخ کړي، چې په پایله کې په ډېرې سختۍ سره ویده کېږو او کله چې له خوبه را ویښېږو بدن مو بې انرژي وي . تاسو ته سپارښتنه کوو، چې په ذهن کې مو د تل له پاره باید د ۲۰ ـــ ۲۰ ـــ ۲۰ قانون پاتې شي، یانې که چېرې اړ یاستئ، چې د ۲۰ دقیقو له پاره خپل ځیرک ټیلیفون یا ټبلېټ ته وګورئ، باید د شلو ثانیو له پاره خپلو سترګو ته آرامتیا ورکړئ او د ۲۰ ګامونو په واټن سره خپل شاوخوا ته بل څیز ته وګورئ، ترڅو سترګې مو خپله آرامتیا تر لاسه کړي . دغه راز اړینه ده، چې خپل موبایل ټیلیفون له خپلو سترګو څخه په مناسب واټن کې لرې وساتئ .

۲ ـــ د خوب د کیفیت کموالی :

د ځیرکو ټیلیفونو یو وژونکی زیان، د بې خوبۍ ستونزه ده، ځکه چې ډېری خلک د خوب او استراحت پرمهال هم له خپل ځیرک ټیلیفون څخه ګټه اخلي او نه ویده کېږي .

د ټولنیزو شبکو معتادان او دغه راز هغه کسان، چې کاري روږدتیا لري، په ډېرې سختۍ له خپل موبایل یا ټبلېټ څخه جلا کېږي، ځکه د دوستانو پیغامونه او یا کاري برېښنا لیکونه دوی د یوې شېبې له پاره هم ازګار نه پرېږدي . دا اندېښنې او خواشینۍ خوب حراموي .

۳ ـــ د ټکر خطر :

هرو مرو تاسو هم ډېر کسان لیدلي، چې د موټر چلونې پرمهال ټیلیفوني پیغامونه لیکي او استوي یې . دا ډول کسان له بدمرغه نه یوازې له خپل ژوند سره، بلکې د نورو له ژوند سره هم لوبې کوي .

البته د موټرونو د ټکر پېښې یوازې په وخت پورې تړاو نه لري، چې سترګې مو سړک ته نه وي . د متخصیصینو په باور، کله چې په ټیلیفون باندې خبرې کوئ او د بل کس خبرو ته غوږ نیسئ، ستاسو د ذهن تمرکز ۳۸ سلنه را کمېږي . په یاد مو وي، چې دا پېښې هغه مهال هم را منځته کېدای شي، کوم چې تاسو پلی مزل کوئ او پیغامونه لېږئ . ډېری کسان د سړک څخه د تېرېدو پرمهال هم ورته را رسېدلي پیغامونه لولي او یا هم پیغامونه لېږي، چې د فرد له پاره ځاني خطر لري . په یاد مو وي، چې د ځیرکو ټیلیفونونو دا خطر نه جبران کېدونکی دی .

۴ ـــ د غاړې ( ورمېږ ) پیغامیز سندروم :

د دې سندروم نوم نوی د خلکو په ژبو دی . د غاړې پیغامیز سندروم د ملا په تیر باندې د زیات فشار پایله ده، چې دلیل یې د وروستیو پیغامونو او پوسټونو د لوستلو له پاره د سر ټیټ اچولو له امله را منځته کېږي .

په هغه مقاله کې، چې په دې وروستیو کې په واشنګتن پست کې چاپ شوې ده، راغلي : زموږ د سر وزن، چې په افقي وضعیت کې وي، شاوخوا ۵.۵ کیلو ګرامه دی، خو هغه مهال چې غاړه د ۶۰ درجې زاویې په کچه کږېږي، د وزن کچه یې ۲۷ کیلو ګرامو ته رسېږي .

په پایله کې غاړه او د ملا تېر اړ کېږي، چې ډېر زیات وزن وزغمي، خو ستونزه په دې کې ده، چې تاسو په مجازي نړۍ کې داسې ډوبېږئ، چې هېڅ فشار نه احساسوئ . له بده مرغه دا وضعیت د وخت په تېرېدو سره، د غاړې د مریو د خرابېدو سبب کېږي او حتی جراحي عملیات ته اړتیا پیدا کوئ .

که چېرې په غاړه او د ملا په مرۍ باندې د ۲۷ کیلو ګرامه وزن درک نه شئ کولای، تصور وکړئ، چې هره ورځ یو اته کلن ماشوم په خپلو اوږو باندې یوې او بلې خوا ګرځوئ .

۵ ـــ چاغښت :

په امریکا د ترسره شوې څېړنې پایله ښیي، هغه کسان چې د اوږدې مودې له پاره له خپل ټیلیفون سره بوخت دي، بدني فعالیت یې کم او له جسمي پلوه تاند او تازه نه دي .

البته ځینې کسان د خپل وجدان عذاب د کمښت له پاره په خپل تردمیل (Treadmill) باندې منډې وهي او د منډې وهلو په حال کې هم پیغامونه لېږي . باید پوه شئ، چې دا کار د تمرکز کچه را ټیټوي او فعالیت مو را کموي . سر بېره پردې دا د دې سبب کېږي، چې بدني وضعیت مو سم نه وي او په سمه توګه ونشئ کولای، چې په خپلو غړو باندې کار وکړئ

۶ ـــ د لیکنیو ګوتو سندروم ( Text claw ) :

که چېرې دهغو کسان برخه یاستئ، چې ټایپ ډېر کوي، احمتالاً د کارپال کانال له سندروم، له هغې سختې ناورغۍ سره، چې د اعصابو د تراکم له امله په لاسونو او ګوتو باندې د ډېر زیات فشار په دلیل را منځته کېږي، آشنا یاستئ . سربېره پر دې یوه بله ځانګړې ستونزه هم شتون لري، چې تر اوسه په طبي او علمي توګه نه ده ثابته شوې . دا ستونزه له سمارټ ټیلیفونونو څخه ډېره زیاته ګټه اخیستنه ده، چې د لیکنیو ګوتو د سندروم په نامه مشهوره ده، ځکه کله چې یو متن ټایپ کوئ، د لاس ګوتې خپل فعالیت پیلوي . په دې کار کې افراط د دې سبب ګرځي، چې په لاس باندې ډېر زیات فشار راشي او د لاس په بند او ګوتو کې درد را منځته شي .

ژباړه : عطا محمد میاخېل

صافی بنسټ خبرتیا Safi Foundation Ads Donation

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
وسیع ویب
error: