بکتريا (Bacteria)
بکتريا يو حجروي ژوندي موجودات دي. بېلابېل ډولونه لري. د بکتريا په باره کې مو په مخکينيو ټولګيو کې يو څه معلومات ترلاسه کړي دي. ځينې بکتريا ګټورې دي چې بشر بې له هغوی ژوند نشي کولی، خو يو شمېر بکتريا زيانمنې دي.
پوهانو په 1800 م. کال کې وموندله چې ځينې بکتريا پاتوجن دي؛ يعنې د ناروغيو توليدوونکي دي.
پاتوجن بکتريا د کوربه بدن ته ننوځي د حجرو له زېرمه شوو خوراکي توکو څخه ګټه اخلي او د عمل په جريان کې کوربه ته زيان رسوي. هغه بکتريا چې زيانمنې دي، بېلابېلې ناروغۍ لکه: کولرا، توبرکلوز (TB) او نورې رامنځته کوي.
بکتريا د مستقيم ويش (اميتوز) په واسطه ډېریږي چې په هرو 20 دقيقو کې سرته رسېږي، نو که چېرې لږ شمېر زيانمنې بکتريا بدن ته ننوځي وروسته له څو ساعتونو لس ګونه زره بکتريا منځته راځي په بدن کې د بکتريا د زياتوالي نښې لکه د ستوني درد، د بدن د تودوخې د درجې لوړېدل، نس ناسته، کانګې په پوستکي دانې پيداکيدل او نور دا نښې د توکسين (Toxin) په نامه د زهري موادو په نتيجه کې، چې د بکتريا په وسيله توليد شوي، منځته راځي.
