ام د ټولو مېوو پاچا بلل کېږي. ام د تودو او استوایي سیمو مېوه ده چې نن سبا ور څخه په ټوله نړۍ کې د یوې ارزښتناکې مېوې په توګه ګټه اخیستل کېږي. ام د بتاکاروټن، وېټامین اې، وېټامین سي او پوتاشیمو اصلي منبع ګڼل کېږي. نیم ام د بلې مېوې له یوه واحد سره برابر دی چې ۷۰ کالوري انرژي لري.

د ام یو ګیلاس یخ جوس څښل په روژه ماتي کې په طبيعي ډول ستاسو بدن د انرژۍ له اړخه پر ځان بسیا کوي چې عمده علت یې هم په ام کې په ډېره پیمانه د فرکتوز شتون دی. دا چې ام په خپل ترکیب کې په زیاته اندازه فرکتوز لري، نو پر دې اساس د هغه غوړینو او کلکو غذایي موادو په هضم کې هم ډېره مرسته کوي، کوم چې د فایبر د نه شتون له امله په معده او هاضمي سیستم کې د ډېرو خطرناکو ناروغیو د رامنځته کېدو لامل ګرځي.

له روژه ماتي وروسته د ام د جوسو څښل د خېټې درد، د معدې پړسوب او دغه راز په لویو کولمو کې د ګازو د تولید مخه نیسي. پاملرنه: هغه کسان چې ګرم طبيعته دي، په زیاته اندازه د ام کارول ورته مضر دي.